له‌رۆژی له‌: 2002/5/17ز مامۆستا كرێكار كه‌وته‌ به‌رده‌ستی ئاخونده‌كانی ئێران و ئه‌وانیش دوای بێئومێدبوونیان لێی ( كه‌كاریان له‌گه‌ڵدا ناكات) ته‌سلیم به‌هۆله‌ندایان كردو له‌وێش دوای سێ مانگ زیندانی و نه‌سه‌لمانی هیچ تاوانێك له‌سه‌ری راده‌ستی نه‌رویجیان كردو نه‌رویجیش دوای 19 ساڵ بێمافكردنی و 64 جار دادگاییكردنی راده‌ستی ئیتاڵیای كرد، یوسوفه‌كه‌ی عه‌زیزی ئێمه‌ ئێستا له‌ئیتاڵیا له‌زیندانه‌، زیاتر21 ساڵه‌ له‌كوردستان دووره‌. ئێمه‌یش به‌م بۆنه‌یه‌وه‌ ئه‌م هۆنراوه‌یه‌ی بێخۆدی شاعیر (رحمه الله) كه‌ به‌ده‌نگی خۆیه‌تی بۆ به‌ڕێزتان په‌خش ده‌كه‌ین.. 

لەو ڕۆژەوە ڕۆیشتووە تۆراوە دڵی من
هەرچەند ئەگەڕێم بێ سەر و شوێن ماوە دڵی من
ئاخۆ بە چ شاخێکەوە گیرساوە دڵی من
یا خۆ بە چ داخێکەوە سووتاوە دڵی من
ئەو هەمدەمی غەمخوار و نەدیمی منە یا ڕەب
ئەو مەحرەمی ئەسرار و قەدیمی منە یا ڕەب
ئەو گەوهەری شەهوار و یەتیمی منە یا ڕەب
کەوتۆتە چ بەحرێکەوە، خنکاوە دڵی من
مەجنوونی دوو گیسوویی چ لەیلایێکە ئاخۆ
یا وامیقی جادوویی چ عەزرایێکە ئاخۆ
دێوانەیی ئاهوویی چ سەحرایێکە ئاخۆ
کام چیهرەپەری دیوە کە ترساوە دڵی من
ئەتلێتەوە گاهێ بە خەیاڵی خەت و خاڵی
ئەخولێتەوە گاهێ بە چرای شەوقی جەماڵی
نازانی ئەگەر چۆنە بەدەس دەردەوە حاڵی
وەک پووش و پەڵاشێکە بەدەم باوە دڵی من
لەو چۆڵ و بیابانە ئەبێ یاوەری کێ بێ
یا بەو کەژ و کێوانەوە سەوداسەری کێ بێ
یا لەت لەت و ئەفگاری موژەی خەنجەری کێ بێ
چۆن ماوە لە سەد لاوە کە کوژراوە دڵی من
بۆچی نەڕژێ سەیلی سروشکم وەکوو باران
بۆچی وەکوو یەعقووب نەبمە شوهرەیی شاران
لەو یۆسفە پرسیومە لە بێگانە و یاران
هەرگیز نییە سۆراغی لە هیچ لاوە دڵی من
بۆ خۆی بگریم یا نەفەسی پەردەدڕاوی
یا بۆ جگەری کون کون و سەدپارەکراوی
چی کردووە یا ڕەب، کە خەو و خواردن و ئاوی
دایم غەم و بیداری و خوێناوە دڵی من
ئەو سینە لە غەش خاڵییە، ئەو بێ ڕق و کینە
ئەو خادیمی شەرعی نەبەوی و میللەت و دینە
مەعلووم چووە بۆ خزمەتی سالاری مەدینە
وام زانی کە فەوتاوە، نەفەوتاوە دڵی من
زاتێکی وەهای گرتووە ڕۆحم بە فیدای ئەو
شاهان شەو و ڕۆژ دێنە قەدەمبۆسی گەدای ئەو
بێخود مەبە ئیتر بە ئومێد و بە تەمای ئەو
نایێتەوە لات گەر سەری داناوە دڵی من